1. ຈຸດປະສົງລວມຂອງຫລັກສູດ

ມີຈຸດປະສົງເພື່ອ ພັດທະນາຊັບພະຍາກອນມະນຸດທາງດ້ານການເປັນຜູ້ປະກອບການ ໃຫ້ມີຄວາມຮູ້ຄວາມສາມາດໃນການສ້າງຕັ້ງ ແລະ ດຳເນີນທຸລະກິດໄດ້ຢ່າງມີປະສິດທິຜົນສູງ ໂດຍສະເພາະແມ່ນສ້າງໃຫ້ຜູ້ຮຽນມີຄວາມຮູ້ຄວາມສາມາດດ້ານການເຮັດທຸລະກິດຂະໜາດນ້ອຍ ແລະ ກາງ ທີ່ແນໃສ່ເຮັດໃຫ້ທຸລະກິດເຕີບໂຕຢ່າງຕໍ່ເນື່ອງ.  ນັກສຶກສາຈະມີຄວາມຮູ້ທີ່ແນ່ນອນໃນດ້ານການເປັນເຈົ້າຂອງທຸລະກິດ ເຊັ່ນ: ການສ້າງແຜນທຸລະກິດ, ການເຂົ້າແຫຼ່ງທຶນ, ການບໍລິຫານຈັດການ, ການເລີ່ມຕົ້ນທຸລະກິດ, ຮູ້ຈັກຂັ້ນຕອນ ແລະ ການປະກອບເອກະສານ ການນໍາເຂົ້າ ແລະ ສົ່ງອອກ; ມີຄວາມຮູ້ໃນການຄຸ້ມຄອງທຸລະກິດ; ມີຄວາມຮູ້ກ່ຽວກັບທິດສະດີທາງການຄ້າ, ການລົງທຶນ, ການດໍາເນີນທຸລະກິດ, ການບໍລິຫານຕ່ອງໂສ້ການສະໜອງ ແລະ ທັກສະບໍລິຫານທຸລະກິດຕ່າງໆ ແລະ ໝູນໃຊ້ເຂົ້າກັບສະພາບການເສດຖະກິດໃນປັດຈຸບັນ ເພື່ອໃຫ້ເກີດປະໂຫຍດສູງສຸດແກ່ ນັກສຶກສາເອງ, ແກ່ປະເທດຊາດ ແລະ ໄດ້ຮັບປະສິດທິຜົນ ພ້ອມທັງສາມາດດຳເນີນທຸລະກິດປະເພດຕ່າງໆ ລວມທັງກິດຈະການເພື່ອສັງຄົມ; ເຂົ້າໃຈລະບຽບຫຼັກການທີ່ກ່ຽວຂ້ອງດ້ານໃນການດໍາເນີນທຸລະກິດຢູ່ພາຍໃນ ແລະ ສາກົນໂດຍສະເພາະແມ່ນກອບອາຊຽນໄດ້ຫຼາຍຂຶ້ນ.

2. ດ້ານວິຊາສະເພາະຂອງຫລັກສູດ

1.    ເພື່ອໃຫ້ນັກສຶກສາມີໂອກາດ ປັບປຸງປັດຊະຍາໃນການດຳລົງຊີວິດ ໃນດ້ານວິທີການຄິດ, ວິທີປະພຶດ, ວິທີການຮັບມືກັບການເປັນມືອາຊີບໃນສະຖານະການຕ່າງໆ ແລະ ວິທີການຮັບມືກັບບັນຫາສ່ວນຕົວ, ຄອບຄົວ, ແລະ ການປະກອບສ່ວນໃນສັງຄົມ.

2.    ເພື່ອໃຫ້ນັກສຶກສາມີທັດສະນະທີ່ຖືກຕ້ອງ (ມີຄວາມສາມາດຜັກດັນໃຫ້ມີການປ່ຽນແປງ, ຮັບຮູ້ກ່ຽວກັບການປັບປຸງຢ່າງຕໍ່ເນື່ອງ, ມີຄວາມເຊື່ອວ່າໂອກາດມີຢູ່ທຸກບ່ອນ; ເຊື່ອມສານລະຫວ່າງນະວັດຕະກໍາ, ການປ່ຽນແປງ, ການເຕີບໂຕ, ແລະ ຄວາມສາມາດໃນການຮຽນຮູ້ຈາກຄວາມລົ້ມເຫລວ), ມີພຶດຕິກຳທີ່ຖືກຕ້ອງ (ສູ້ຊົນໃສ່ໂອກາດ, ນະວັດຕະກຳ, ການອຸທິດຕົນ, ການລົງມືປະຕິບັດ, ແລະ ການບໍລິຫານຄວາມສ່ຽງ), ແລະ ມີຄວາມສາມາດ້ານວິຊາການ (ມີສາມັນສໍານຶກດ້ານການປະກອບກິດຈະການ).

3.    ເພື່ອພັດທະນາຈິດສຳນຶກດ້ານນະວັດຕະກຳໃຫ້ແກ່ນັກສຶກສາ.  ເພື່ອສ້າງກໍາລັງໃຈໃຫ້ນັກສຶກສາມີວິທີການໃໝ່ໃນການເບິ່ງບັນຫາ, ກວດກາເບິ່ງຂະບວນການປ່ຽນແປງ ແລະ ຄວາມສໍາຄັນຂອງກິດຈະກໍາການປ່ຽນແປງ ຕໍ່ກັບຕົນເອງ, ຄອບຄົວ, ສັງຄົມ, ແລະ ໂລກ. 

4.    ເພື່ອສຶກສານັກສຶກສາໃຫ້ຮັບຮູ້ສິ່ງທ້າທາຍ ແລະ ຜົນຕອບແທນຂອງການປະກອບກິດຈະການ, ຮັບຮູ້ທັກສະ ແລະ ພຶດຕິກຳຂອງການປະກອບກິດຈະການ.

5.    ເພື່ອສະໜອງຂໍ້ມູນຂ່າວສານໃນການສ້າງແນວຄິດທີ່ມີນະວັດຕະກຳ, ການຫລີກລ້ຽງບັນຫາ ແລະ ເຫວເລິກ ຂອງການປະກອບກິດຈະການ, ການກວດກາເບິ່ງສະຖານທີ່ ແລະ ວິທີການຊອກຫາການຊ່ວຍເຫລືອ-ການສະນັບສະໜູນ, ແລະ ນຳໃຊ້ສິ່ງທີ່ຮຽນຮູ້ເຂົ້າໃນກິດຈະການສ່ວນຕົວ, ການບໍລິການສັງຄົມ, ແລະ ທຸລະກິດ. 

6.    ເພື່ອສ້າງແຮງບັນດານໃຈໃຫ້ນັກສຶກສາ ແລະ ສະນັບສະໜູນເຂົາເຈົ້າໃນການວາງແຜນເພື່ອຄວາມສຳເລັດ. 

7.    ເພື່ອສ້າງໂອກາດທີ່ຫລາກຫລາຍໃນການພັດທະນາ ແລະ ນໍາໃຊ້ທັກສະຂອງການປະກອບກິດຈະການ ພ້ອມທັງໃຫ້ເຂົາເຈົ້າໄດ້ຮຽນຮູ້ຈາກຜູ້ທີ່ເປັນແບບຢ່່າງ ແລະ ຜູ້ໃຫ້ຄຳປຶກສາ ຈາກທ້ອງຖິ່ນ, ລະດັບຊາດ ແລະ ສາກົນ.

8.    ເພື່ອໃຫ້ນັກສຶກສາຂຸດຄົ້ນທ່າແຮງບົ່ມຊ້ອນຂອງຕົນເພື່ອລິເລີ່ມກິດຈະການສ່ວນບຸກຄົນ, ເພື່ອສັງຄົມ, ແລະ ທຸລະກິດ.

3. ມາດຕະຖານຜູ້ເຂົ້າສຶກສາ.

– ນັກສຶກສາທີ່ຮຽນຈົບມັດທະຍົມປາຍ ມ 7 ຫຼື ທຽບເທົ່າ ສາມາດສອບເສັງຕາມລະບຽບການຂອງວິທະຍາໄລສະຫະກິດສຳພັນ.

–  ນັກສຶກສາຮຽນຢູ່ມະຫາວິທະຍາໄລ ໃນສາຂາວິຊາຕ່າງໆ ທີ່ຕ້ອງການກາຍເປັນຜູ້ປະກອບກິດຈະ

ການ.

–  ພະນັກງານທີ່ຢູ່ໃນຂະແໜງເສດຖະກິດ, ນັກທຸລະກິດຂະໜາດນ້ອຍ ແລະກາງທີ່ຍາກຍົກລະດັບຄວາມຮູ້ຄວາມສາມາດໃນການປະກອບທຸລະກິດໃຫ້ສູງຂຶ້ນທີ່ມີຄຸນວຸດທິຈົບມັດທະຍົມ ມ 7 ຫລື ທຽບເທົ່າ.

–  ເປັນຜູ້ບໍ່ມີພະຍາດຮ້າຍແຮງ ທີ່ ເປັນອຸປະສັກແກ່ການສຶກສາ.

–  ເປັນຜູ້ບໍ່ມີຄະດີອາຍາ ຫຼື ກະທໍາຜິດຕໍ່ລະບຽບ ແລະ ກົດໝາຍຂອງ ສປປ ລາວ, ບໍ່ປະພຶດເສື່ອມເສຍຮີດຄອງປະເພນີຢ່າງຮ້າຍແຮງ ຫຼື ຖືກໄລ່ອອກຈາກສະຖາບັນການສຶກສາອື່ນມາກ່ອນ.